مکمل پاکستان پارٹی کے چیئرمین محمد عبدالمتین ہاشمی نے کہا ہے کہ ہماری جماعت کسی بھی صورت عوامی جذبات کو بھڑکا کر یا غیر حقیقی وعدے کر کے ووٹ حاصل کرنے پر یقین نہیں رکھتی۔ ہم پاکستان میں مثبت، باوقار اور اخلاقی سیاست کا آغاز کرنا چاہتے ہیں۔

چیئرمین کا کہنا تھا کہ مکمل پاکستان پارٹی عوام کو تقسیم کر کے یا سیاسی انتشار پھیلا کر ہمدردی حاصل نہیں کرنا چاہتی۔ ہمارا مقصد صرف اور صرف پاکستان کی ترقی اور قومی مفاد ہے۔ سیاست ایک خدمت ہے، جذباتیت یا دشمنی کا میدان نہیں۔
انہوں نے کہا کہ آج پاکستان کو ضرورت ہے ایسی سیاست کی جو اتحاد، برداشت اور مثبت سوچ پر مبنی ہو۔ تمام سیاسی جماعتوں کو ایک صفحے پر آنا ہوگا تاکہ ہم اجتماعی طور پر ملک کو ترقی، خوشحالی اور استحکام کی طرف لے جا سکیں۔
چیئرمین عبدالمتین ہاشمی نے واضح کیا کہ مکمل پاکستان پارٹی الیکشن میں بھرپور حصہ لے گی اور عوام سے ووٹ بھی مانگے گی، مگر کسی قیمت پر قوم کو تقسیم کر کے یا عوام کے جذبات سے کھیل کر ووٹ حاصل نہیں کرے گی۔

ان کا کہنا تھا کہ ہماری سیاست اصولوں، اخلاقیات اور عوامی خدمت پر مبنی ہے، اور یہی راستہ پاکستان کی حقیقی ترقی کی ضمانت ہے۔