مکمل پاکستان پارٹی کے چیئرمین محمد عبدالمتین ہاشمی نے اپنے بیان میں کہا ہے کہ بیرونِ ملک مقیم پاکستانی ہمارے ملک کا قیمتی اثاثہ ہیں اور ان کے جان و مال، عزت اور بنیادی حقوق کا تحفظ ہر حال میں یقینی بنایا جانا چاہیے۔ کسی بھی پاکستانی شہری کے ساتھ پیش آنے والا افسوسناک واقعہ صرف ایک خاندان کا نہیں بلکہ پوری قوم کا درد بن جاتا ہے۔

انہوں نے کہا کہ موجودہ حکومتِ پاکستان کو چاہیے کہ اس نوعیت کے معاملات میں فوری طور پر سفارتی سطح پر رابطے قائم کرے، حقائق معلوم کرے اور متاثرہ خاندان کو مکمل معلومات فراہم کرے۔ اگر کسی پاکستانی شہری کی وفات بیرونِ ملک دورانِ حراست یا کسی غیر معمولی صورتحال میں ہوتی ہے تو حکومت کی ذمہ داری ہے کہ وہ معاملے کی مکمل تفصیلات حاصل کرے اور متاثرہ خاندان کو ہر ممکن قانونی، سفارتی اور اخلاقی معاونت فراہم کرے۔

محمد عبدالمتین ہاشمی نے مزید کہا کہ اوورسیز پاکستانی پاکستان کی معیشت اور ترقی میں اہم کردار ادا کرتے ہیں، اس لیے ان کے تحفظ اور حقوق کے لیے ایک مضبوط اور مؤثر نظام وقت کی اہم ضرورت ہے۔ حکومت کو چاہیے کہ دنیا بھر میں پاکستانی سفارت خانوں کو مزید فعال بنائے تاکہ کسی بھی ہنگامی صورتحال میں پاکستانی شہریوں اور ان کے اہلِ خانہ کی بروقت مدد ممکن بنائی جا سکے۔

انہوں نے مرحوم کے اہلِ خانہ سے اظہارِ ہمدردی کرتے ہوئے دعا کی کہ اللہ تعالیٰ مرحوم کو اپنے جوارِ رحمت میں جگہ عطا فرمائے اور لواحقین کو صبرِ جمیل نصیب فرمائے۔